風水佬呃你十年八年，落飛黨卻冇花冇假，這天第六場四班一哩，賀賢馬房「勝利仔」在柏寶胯下克服12檔，不但為馬兒連捷，更為落飛黨贏大錢。
「勝利仔」呢匹四歲馬閘前俾落飛黨瘋狂落注，由10倍過外打到開跑時為4.6倍大熱門，結果齋跑拉士百幾米，於外叠好似裝咗摩打咁，一陣風咁將所有對手追過，力挫蔣嘉琦之「盈豐駿駒」，柏寶衝線時向右望實蔣嘉琦，似向她示威。「勝利仔」連捷於同程，今次組合獨贏開A3並派17元。柏寶剛周日遠征日本騎「詠彩繽紛」於安田紀念賽包尾，這天回師本土賽事贏番場馬補數。
落飛黨不但中Win，「勝利仔」搭全線馬匹Ｑ亦落飛，此駒搭「盈豐駿駒」Ｑ隔晚過百倍，最終卻賭至13倍並成功開出，落飛黨在此場WQ彩池獲利近2,000萬。
今場三、四名分別係「魅力好漢」及「勁勇威龍」，四重彩派四萬八千幾。三T正獎有人中，每注派352萬幾。