1996年港姐冠軍李珊珊近日因義賣后冠，又被傳患重病而再受關注，跟李珊珊同屆嘅港姐季軍袁彩雲，自嫁人兼移居去加拿大之後，近年都冇乜消息，專心相夫湊女；最近華華得知，佢原本同家姐合資購買嘅一個鰂魚涌太古城三房單位，租客啱啱完約，佢哋順便以逾千萬賣走，獲利甚豐。
袁彩雲兩姐妹早於2002年合資280萬元，買入元宮閣高層單位，今年3月放盤時叫1,080萬元，最後減咗52萬元以1,028萬元售出，賬面淨賺近750萬元，升值2.7倍，未計租金收入，兩姐妹對分嘅話，每人有375萬進賬。
袁彩雲喺娛樂圈時，曾傳出數段戀情，當中包括2006年傳與合和（054）太子爺胡文新相戀。佢2009年跟飲食業才俊Anthony結婚，就過少奶奶生活，間中回港探朋友，唔知佢仲有冇同李珊珊聯絡，問候吓姐妹呢？