45歲辣媽鍾麗緹（Christy）今年秋天準備迎接第三段婚姻，嫁俾八十後、細佢十二年嘅張倫碩，之後即有報道指，張倫碩嘅媽媽曾經因為Christy年紀大，擔心佢冇得生，勸過囝囝搵個年輕啲。咁當然，去到求婚儀式當日，成件事已經唔同晒，張媽媽對Christy改觀晒，讚佢善良、獨立、孝順、正直等等，仲話：「她是會讓我兒子很幸福的女人。」
求婚儀式當日原來鍾麗緹嘅父母係第一次見未來女婿，鍾爸爸最鍾意張倫碩唔吸煙、唔飲酒，又鍾意做運動，兩人雖然語言不通，但都可以傾得好開心。
既然咁開心，不如見多幾面。求婚成功之後，前日Christy同張倫碩帶埋個女，仲有Christy媽媽一齊度假返京。內地傳媒影到佢哋喺候機室裡面，張倫碩拖著個女喺前面行，Christy就扶住媽媽殿後，一家四口樂也融融，似乎張倫碩真係已經成功融入家中。