四年一度的歐國盃周五在法國展開，香港播映權由now TV與樂視取得，前者面對來勢洶洶的新競爭對手，除邀請毛記電視的外援助威，又邀得著名評述員馬啟仁（Keyman）復出，與效力冠忠南區的港隊門將謝德謙等新丁聯手出擊，以老帶新迎戰強敵的挑戰。
賽事展開前，Keyman、謝德謙及陳葦茹與三位女主持譚淇淇、鄧洢玲及張嘉殷大談今屆賽事；對於外界指Keyman為now TV復出，他笑指是報章朋友小題大做，因為一直沒有離開，何來復出，他說：「其實只係有一段時間冇講波，對上一次講波係2014世界盃決賽，因為愛隊（阿根廷）輸咗，所以『掛咪』。講笑啫，其實係過去一段時間做較多幕後工作。今個暑假就到時間咪再講波。」他表示因已有一段時間沒當評述員，近期特別「加操」（做運動備戰），希望順利完成。
靚仔謝德謙「爭食」
Keyman指希望與舊拍檔如曾偉忠、陳炳安、陳葦茹、方栢翹重聚，更期待是與林慶麟及謝德謙合作：「當年睇林sir（林慶麟）踢波，𠵱家有機會同林sir合作講波，希望會擦出火花。至於仍然係球員身份嘅謝德謙唔知點解會殺入足球評述界『爭食』，除靚仔，睇唔到有其他原因，但講波唔係靠雙手同靚仔，總之就係期待。」
對於被Keyman指謝德謙「爭食」，阿謙回應絕對不敢，並指是來學習，他說：「電視台可能見我喺ViuTV做《體育係...》主持咪叫我試試，自己踢開波，又鍾意足球，想以自己經驗去分析，希望為球迷帶嚟唔同觀點或意見。當然期待同Keyman合作，最想學到佢講波瓣瓣有，轉數亦快。」今屆看好法國、西班牙及德國的謝德謙自爆記性很差，要看很多次才記住球員名，現正努力備戰，為「處子」評述賽事做好準備。
最期待「神級」伊巴
問到今屆歐國盃決賽周增至24隊會否提高賽事的水平時，Keyman指強隊如比利時的優勢未必如外界所想般大，冰島及威爾斯等新丁也可能締造爆冷賽果。他最期待是瑞典，因為有「神級」的伊巴謙莫域。他說：「未必每個人都鍾意佢，但冇人會討厭佢，因為佢可以做到啲不能想像嘅嘢，似乎球壇欠咗佢一啲嘢。佢年紀唔細，睇一場少一場，瑞典打唔打到入決賽冇人知道，但希望可以走得更遠。」
記者：曾雁平、盧曉君
攝影：李潤芳