【本報訊】香港的「土地問題」，已令不少香港夫婦即使婚後都要「Long D」（Long Distance，遠距離戀愛），即分開住。高薪厚職的魯庭暉（魯暉）應該沒此困擾，但他的愛情卻是「由拍拖去到求婚，再去到結婚都係Long D」，是隔着一整個太平洋的愛情故事。
「諗唔好結 結唔好諗」
魯暉於其他訪問中絕少提及自身感情生活，外間只知道他已婚。「由拍拖去到求婚，再去到結婚都係Long D」。並非拍拖後其中一方要去外國工作，而是魯生、魯太的戀愛一開始就是一場Long D，「2008年我係外國返嚟，認識咗就飛返去」。
Long D拍拖短短一個月，魯暉再次回港，隨即求婚。「咁不如結婚囉，又飛返去。之後喺嗰邊send email book場，返嚟結完，我又走」。婚後嘗試半年Long D生活，魯暉笑言：「好似假結婚咁。佢試過move過去住一陣，發現唔慣，而且佢工作需要係香港多啲。」對於結婚，魯暉吐出八字真言：「諗唔好結，結唔好諗。」
問到魯太有沒有「詐型」，魯暉稱：「唔知喎，暫時仲係我老婆，應該OK啩。」對於生小朋友，魯暉表示無計劃。「冇喎，咁忙，我行答你咪順其自然囉」。當記者進一步追問其背後女人的資料，魯暉隨即護妻，「癡線咩，我係劉德華咩，冇人有興趣睇㗎，唔好搞佢啦。」
訪問中，魯暉亦表現出愛妻的一面，「佢好辛苦㗎喇，我做咁多嘢，佢又唔係呢行嘅人」。他指作為台長背後的女人，「佢有個好處，佢對於我所有嘅成就，報紙所有嘅野，佢完全唔覺得我叻。呢個好緊要，佢冇感覺，你都係打份工啫，唔會因為見報而代表啲咩嘢」。