近期成為網上紅人嘅鍾樹根，喺立法會亦俾唔少議員捉住密斟，其中人力陳偉業就問佢會否轉戰新西，因為民記新西原有三席，現時只派出兩隊出選。Tree根聽到耍手擰頭，似乎機會不大。
Tree根又趁周日剪咗個新髮型，話「潮流興」，「理髮師話試咗咁嘅款啦，橫掂你呢輪唔老利，試吓改吓啦！」而佢自己最欣賞新髮型條界，問八方︰「我條界鏟得幾好嘛？」Tree根又透露，民記主席琼子近日已約佢傾偈，佢就忙於落區派嘢，對於黨友近日接連爆出醫療醜聞，Tree根話不便評論，但曾自稱係民記瘜肉嘅佢話，自己真係切過瘜肉，但已經係30年前嘅事，當年因為鼻敏感，所以去咗半山醫院切鼻部瘜肉喎。