今年2月成立嘅新環團「綠惜地球」前日搞咗個啟動禮，邀請過百環保、政商、學術界別人士到場，包括署理環境局局長陸恭蕙、中電總裁潘偉賢等。新環團主要成員熟口熟面，包括環保界老行尊劉祉鋒，做過記者、又做過環團嘅朱漢強，仲有做開社區教育嘅鄭茹蕙。三位都曾經喺環團地球之友工作過，現就再次成為戰友。
綠惜地球創辦人兼總幹事劉祉鋒話，推動咗環保咁多年仲成立新環團，自己都有啲「高齡產婦」感覺。不過，佢睇到香港面臨好多環境挑戰，尤其浪費嘅生活模式，廢物、能源、食水都做唔到可持續發展，未來希望推廣「珍惜」價值，令香港成為綠色城市。