下季英超兩位新上任領隊摩連奴大戰哥迪奧拿肯定矚目，佢哋所屬球會喺季前都不敢怠慢，積極增兵加強實力。曼聯喺周三完成摩帥上任後首簽，嚟自西甲維拉利爾嘅22歲科特迪瓦中堅艾歷拜利（圖）正式加盟，同紅魔簽咗一份四年加兩年嘅合約，據講轉會費高達3,000萬鎊（約3.4億港元），摩佬亦睇好佢他日會成為世界最佳中堅之一。至於曼城亦喺呢幾日同德甲多蒙特密斟，打算收購佢哋嘅首席射手奧巴美揚，後者喺上季德甲上陣29場入25球，教咗拜仁慕尼黑三年嘅哥帥非常睇好佢，佢嘅轉會費絕對唔平，有傳係破曼城球會紀錄5,800萬鎊（約6.5億港元）。