壹傳媒印刷媒體行政總裁及香港《蘋果日報》社長葉一堅今日起正式榮休，不過堅哥仍會擔任壹傳媒集團嘅非執行董事、壹傳媒集團非執行主席，同埋台灣《蘋果日報》主席。喺壹傳媒集團服務咗22年嘅堅哥噚日寄語後輩，傳媒一定要朝數碼化轉型，仲想同《蘋果》同事打氣：「大家加油，守住間屋。」
沙膽虹接棒 大力數碼化
《蘋果》副社長張劍虹就會接堅哥棒，擢升做集團出版媒體行政總裁，以及香港《蘋果日報》社長，佢話會加大力度推動集團港台所有報刊數碼化，作為未來發展目標同方向。
堅哥喺1994年加入壹傳媒，擔任《壹週刊》副總編輯，服務一年後加入《蘋果日報》。2002年，堅哥去台灣，替壹傳媒喺台灣建立台灣《蘋果日報》。八方問堅哥退休有乜感想？堅哥話：「良將如美人，人間哪會見白頭。」喺《蘋果》22年，最令佢難以忘懷嘅一幕，就係2014年10月香港正值佔中時、大媽「圍蘋之亂」：「見到啲同事咁搏命愛護間公司，係好難得。」佢話當時連公司都被圍，「你會覺得點解成個香港都搞成咁。」
喺民主路上，堅哥話《蘋果》仍會肩負重任，「如果《蘋果》冇埋，香港唔知咩世界。」佢話傳媒行業變化急速，佢教人做報紙就可以，但教做網真係唔識，應由後生接棒：「我65歲，應該畀啲後生上去試，有時都唔好戀棧權位，知所進退。」
堅哥認為報紙喺未來唔會消失，即使消失都不會喺短時間見到，「最近我哋公司做咗好多節流嘅事，係覺得有得救先做㗎啫。」佢話傳媒一定要朝數碼化轉型，「最慘係手機出咗後，2015至2017個市都唔好，變咗幾重打擊。」
至於退休後計劃，堅哥話會留喺台灣，仲想去吓歐洲旅行：「我歐洲都未去過，我鍾意去小島，唔鍾意去大城市，鍾意去陽光海灘。」集團通告話，壹傳媒會向堅哥收購蘋果日報出版已發行股份2%，代價係884萬港元，堅哥應該夠晒錢去歐洲小島玩！
李八方
mailto:[email protected]