不少畢業生已展開「搵工之旅」，相信亦已寄出海量求職信，如果你收到面試回音，恭喜你經已向成功獲聘邁出一大步，但如何在短短約一小時的面試中突圍而出，安俊人力資源顧問董事總經理周綺萍再向一眾畢業生「教路」，避免一些常犯錯誤，小如衣着，大如對話內容，都足以決定準僱主對自己留下好還是壞印象。
記者：容文穎
畢業生面試，通常都以黑西裝，白恤衫示人，但周綺萍直言此等衣着毫無個人特式，太樣版式，「坦白講，個個都係咁，我都唔記得你係邊個打邊個」。她提醒應徵者，可在傳統斯文服飾中略加添特式，顯得與眾不同，「唔一定着黑色架，有深藍色嘅啫，有灰色嘅啫」，女生在夏天更可選擇淺色系列，如白色、粉色、淺藍等，恤衫亦不用傳統地只有鈕扣，可以有少許花邊，增添特別，「使人覺得你係有自己嘅character(個性)」。
所攜帶的配件如手袋等亦不能輕視，切勿向媽媽、姊姊借來與自己年齡不相稱的配件作見工，「用阿媽或者家姐個手袋，即係佢唔係好independent(不獨立)，連手袋都唔識自己去買，點出嚟做嘢」。她提醒畢業生面試前要先做資料搜集，了解公司的背景，再從而調整衣着。
周綺萍又提到另一近年常發生的畢業生面試大忌，就是「帶着阿爸阿媽去面試」。周憶述曾有客戶與一名應徵者在餐廳進行第二次面試，原本過程順利，打算聘請對方，但離開餐廳時，竟在接待處發現應徵者與母親一同前來，隨即打消聘請念頭，「咁佢第日點返工呢，一陣我叫你出去，你又話唔去」。
或許不少應徵者都曾遇過，面試過程中遇上「無厘頭」問題，但周綺萍強調千萬不可直接說「不懂」，應用盡力解答問題，「通常啲問題唔係要你識答，係睇你點handle(應付)條題目……個attitude(態度)先最重要。如果試都唔肯試，第日畀啲工作你做，你無試過嘅，就試都唔肯試」。
面試最後通常會問應徵者有否問題需要詢問，周綺萍說最好有一至兩條問題提問，問題不要是關於薪酬及福利等，應圍繞在工作及發展機會上，如相關培訓、行業發展等，才能突顯你對工作的興趣及熱誠。除此之外，在面試後給予面試者一個感謝電郵，亦能令對方加分，提升獲聘機會。
相關新聞：
【職時新聞】畢業生是時候搵工了 教你CV點突圍而出
http://bit.ly/25JxrI6