今年參加維園六四靜坐的人數，支聯會公佈，有125,000人，警方估計人數有21,800人，差距5.73倍，是近年相差最大的。據蘋果日報的資料，自1990年起計，今年的人數是歷年來排行第九，並不失禮，1992至2008年的17年間，人數不過是35,000至8萬人而已。如計算警方估計人數，與支聯會公佈，最接近的一次是2010年，支聯會公布有150,000人，警方估計有113,000人，打了個七五折，雙方計人數嘅差額，歷年都是相差兩至三倍左右，比率相對穩定，但今年突然相距5.73倍，警方估計少了十萬人以上，確令人吃驚。十萬人不是一個小數目，究竟是支聯會講大話，還是警察點人數嗰陣有白內障，睇唔到幾萬人坐在足球場？
一位80後在1989年跟隨父母參加遊行，之後未有到過維園靜坐紀念六四，那天早上看了左丁山專欄，突然來電告知：「我要去維園，以示抗議樹仁學生的龜公龜婆論。」原來這也是一個參加靜坐嘅理由，不過佢話要帶埋兩歲女兒與大肚老婆去，左丁山就叫佢保護婦孺為重，自己一個去算嘞，但今天年輕人嘅特色之一，就係聽自己講，唔聽老嘢講，結果都係拖埋老婆與小女去維園，但因為如此一來，動作比較慢，去到維園稍遲，已經入唔到場，只好在外圈行一行，算係參加咗六四紀念。
一個老嘢就去足27年，一早知道場內環境，準備充足，有水有櫈仔有縮骨遮，還有雞尾包，足可以幫忙佢抗戰幾小時。呢位老嘢係左丁山朋友，事後左丁山打電話問佢今年情況如何，老嘢話：「後生仔未必錯得晒，就係行禮如儀，悶到抽筋，但我係無論乜情況都會參加六四靜坐嗰種人，當佢地發噏風啦。何俊仁蔡耀昌等人在台上做嘢，我就在球場睇手機打發時間，27年咯，支聯會其實應該與時並進，改變吓儀式程序，唔好年年都宣讀萬字宣言，寫咁長做乜，寫一千字已經夠啦，以前蔡耀昌把哭腔讀到不忍卒聽，今年改由一位女士讀，好啲啲咁啦，但仍然長夾冗。何俊仁、李卓人等真係要諗吓辦法改變紀念方法，先至可以吸引年輕人參加！」明年如無新刺激，六四靜坐人數大有機會下跌到90年代嘅數字，要捱到2019年六四30周年紀念，人數先至會回升。香港人對六四紀念不離不棄，係一項世界紀錄，令呢段慘痛歷史不能給某些人刻意抹去。