區域法院早前裁定酒吧搞「女士之夜」屬性別歧視，噚日政制及內地事務局局長譚志源（圖）出席立法會大會，就俾議員追問點先算歧視，經民聯石禮謙就話一直奉行ladies first，問局長以後出門口係咪唔讓得畀女士？人民力量陳志全（慢必）就問，有打扮男性化嘅女仔去「女士之夜」就冇優惠，咁樣算唔算性別歧視？
譚志源招架唔住議員提問，忍唔住苦笑話「世界越來越複雜」，感慨「希望廿幾分鐘快啲過」，佢又將問題交平機會主席陳章明同勞福局長張建宗答。不過，佢就透露政府已去信平機會，邀請平機會就性別歧視條例條文嘅實施情況進行檢視喎。