現年47歲嘅彭丹近呢幾年都住喺北京，佢𠵱家係甘肅省政協委員，除咗做老本行電影外，又開咗間酒家，真係日理萬機。日前佢同黃百鳴到深圳出席一間酒家開幕儀式，儀式照片喺網上出現後，俾人話佢個樣唔同晒，暗示佢有整容之嫌。馮仁昭前晚打過畀彭丹問：「你有冇去整容啫？全世界都話你個樣唔同晒！」佢話：「吓？有咁嘅事？我年紀會大㗎嘛！我個樣變咗少少有幾奇啫！唔同歲月有唔同變化，我唔明點解話我整咗容！」
下鄉做調查
彭丹又話好感謝大家咁關心佢，但唔好只關心佢個樣：「其實我樣貌冇大變化，心態就有好大變化。我𠵱家除咗做戲同做導演，就係去內地嘅農村同鄉下調查，同當地嘅百姓同吃、同住、同勞動，生活好簡單。咁樣既是一種對生活嘅體驗，又為每次嘅政協提案準備咗素材同第一手資料。」
早兩日彭丹曾返香港同楊受成開會，傾合作拍戲嘅事，佢話：「英皇對製作主旋律劇集同電影好感興趣，我哋傾得好愉快，相信合作會好順利。」
撰文：馮仁昭