真係最後一年喇。羅馬老王子托迪（左）終於喺周二同球會續約，踢埋下季就會退休上神枱。39歲嘅托迪喺12歲就同羅馬簽第一份約，16歲就首次代表一隊披甲，踢到上季就算教練史巴列堤想佢退役，托迪就頻頻入波以表現證明自己仲掂。托迪話好高興總算圓咗「一生一會」嘅心願，亦透露同時同羅馬簽咗另一份六年合約，到下季完結後會做球會技術總監，睇嚟真係成世人打一份工。