香港時間周三朝早上演嗰兩場美洲國家盃A組分組賽，賽果相當正路，東道主美國反彈4:0大炒哥斯達黎加；哥倫比亞就以2:1擊敗巴拉圭提早出線八強。暫時睇美洲盃有啲球隊表現反差大，軍情又混亂，真係要再做多啲功課。美國喺首仗踢得差，但對住哥斯達黎加就變咗第二隊咁，踢到後者教練奧斯卡拉美利斯坐喺場邊喊。哥倫比亞教練比格文賽前講明占士洛迪古斯（圖）因左邊膊頭甩骱而唔出，連馬會都停咗占士首球受注，點知佢又龍精虎猛正選上陣，仲入埋波幫哥軍全取三分。