加入民建聯廿多年嘅鍾樹根(Tree根)慘成棄將，以為佢一沉不起，點知佢反而因此喺facebook爆紅，佢個fb管理員「根毛毛」居功不少。「根毛毛」前晚又發功，上載咗一幅Tree根試玩BB gym嘅相，睇唔清楚到Tree根個樣，但見佢用強而有力嘅臂彎現吊環，一chok成個人升起晒，呈L形咁樣，離晒地，旁邊個人「O晒嘴」，「根毛毛」留言話：「樹根bb試用BB GYM設備！(重細咩…)」，成功呃到過400個likes，過百人畀「嘩」，有人讚佢好man添呀。
Tree根前日同民建聯主席李慧琼出席活動時同枱，雙方冇乜兩句，同枱坐都隔開幾個位，黨內好有地位嘅曾鈺成就讚Tree根好有諗頭。事實上佢呢排有「根毛毛」幫手下，個fb多咗好多人關注，而且正評多過負評，「嬲嬲」數目大減，好似之前Tree根喺民建聯中委會後發表嘅短片，短短一晚有成逾30萬睇，相比黨友周浩鼎個fb擺段「對抗是否就是出路？」嘅片2日，得200幾個likes，嬲就有超過70個，就知「根毛毛」真係犀利架！
大家依家最關心係Tree根幾時先會有最終決定，選唔選立法會？如果選，用咩身份去選呢？睇嚟要睇實Tree根個fb喇。