趣趣地:大簡接手權健教基藍馬

趣趣地:
大簡接手權健教基藍馬

人民幣力量吸引唔少海外球星同教練嚟中國搵食,但搵得快錢就預咗份工做唔長,中超開季只係11場,就已經有山東魯能嘅文尼施斯、江蘇蘇寧嘅彼得斯古等教練下台,中甲方面,港腳吳偉超同基藍馬效力嘅天津權健都大變天,前意大利隊長簡拿華路(上圖中)周三宣佈接任教練,希望扭轉球隊近期頹勢。

據報前國足成員李瑋鋒出任天津副總經理後,同前巴西國家隊教練盧森貝高等巴西幫鬧不和,搞到戰績低迷,𠵱家僅以四勝四和四負排第九位,要升上中超就好困難,結果盧森貝高亦都下台,前西維爾前鋒路爾斯法比安奴,中場謝臣等三名外援都想離隊,估計天津要畀過千萬美元解約費。
天津呢個爛攤子就由大簡接手,周三佢喺自己twitter宣佈出手教權健,大簡之前就教過中超班霸廣州恒大,算係有啲經驗;另外,山東魯能周三亦宣佈,搵前史浩克04、富咸教頭馬加夫接任教練。