力爭首個國際大賽冠軍嘅阿根廷前鋒美斯，周一美洲盃D組首仗分組賽坐足全場，好彩隊友生性，憑「天使」迪馬利亞同班尼加各建一功，以2:1擊敗智利旗開得勝，兼報番上年決賽一敗之仇。迪馬利亞賽前收到外婆過身嘅消息，入波後就走到後備席，高舉「我永遠懷念你」嘅tee。利物浦領隊高路普都有去美國睇波，仲坐喺身兼阿國前鋒希古恩經理人嘅阿哥隔籬；當希古恩74分鐘退下火線，高路普兩分鐘後就離場，睇嚟為收購呢位應屆意甲神射手而鋪路。不過，《利物浦回聲報》就話高帥否認收購。
另外，今屆美洲盃播國歌繼前日播錯烏拉圭國歌，周一係就係播啱智利國歌，但同時播埋美國歌手Pitbull嘅《Mr. Worldwide》，搞到叠晒聲。同日D組另一戰，巴拿馬就以2:1擊敗玻利維亞。