中環在線:李國寶阻記者埋身問裁員 - 李華華

中環在線:
李國寶阻記者埋身問裁員 - 李華華

東亞銀行(023)上星期有180名員工慘食「無情雞」,身為主席嘅李國寶一直未有親身回應事件,反而兩位公子副行政總裁李民斌、李民橋就喺不同場合俾傳媒「截獲」,好似李民斌就係上周出席港華燃氣(1083)股東會時俾傳媒圍堵,唯有半推半就回應裁員問題。
坊間有消息指,李國寶對此甚為不滿,認為港華燃氣方面辦事不力,所以噚日佢以獨董身份出席煤氣(003)股東會時,就講明不見傳媒,公關大員當然即刻做嘢,將採訪區同李國寶會經過嘅地方隔開幾丈遠,成功讓寶哥哥唔使理在場等候多時嘅傳媒,好舒服咁掂行掂過,入房等埋四叔食晏。
其實傳媒都係代東亞員工查詢,想知佢哋仲會唔會繼續派無情雞啫,講句安撫吓員工都好吖。