NBA決賽，除了球迷緊張之外，最緊張的還有巨型球鞋企業Nike。N牌本來在球壇稱雄稱霸已久，但近年德國巨企adidas在足球壇搶佔第一位，生意競爭上嚴重威脅N牌，令N牌聲勢似不如前，即使在香港，a牌承租Coach以前在興瑋大廈的單邊舖王，有三層樓面，人氣旺盛，反之N牌在中環就比較靜。
睇番股價，Nike係近月杜瓊斯指數成份股中走勢比較缺乏表現嘅一隻，反之一隻三藩市新興牌子Under Armour（UA）股價不斷上揚，令股東笑逐顏開。
UA憑乜本錢與N鬥一鬥，原因有兩個，一個就係年青高爾夫球球星，有「新老虎活士」或者「白老虎」之稱嘅Jordan Spieth，22歲仔已贏得8項PGA冠軍，有年青活士色彩，吸引大量球迷，佢就係戴UA喼帽，由UA贊助嘅；第二位就係史提芬居里，憑佢一人之力，令UA球鞋球衣大賣特賣，於是谷高UA股價。
UA由於財力遠遠不及N，難與N爭奪大明星，於是向年青有潛質球員埋手，點知中了金礦，Spieth與居里成為新一代球壇偶像，UA行運行到腳趾尾。不過據ESPN八卦新聞報導，居里未大紅特紅之前，評價一般，冇乜名牌睇起。N曾請居里父子（老居里曾是NBA半紅不黑嘅球星）一齊到N公司見面，點知談判人員一開始就叫錯居里名字（Stephen Curry，小名叫Steph Curry，不是一般嘅Steve），跟住向兩父子做presentation，引用N牌一位大名人杜蘭特（雷霆主將）名字，令居里兩父子大為不悅，拂袖而去。UA於是乘虛而入，搵到居里簽下贊助合約。呢個古仔教訓我地，無論甚麼大公司，招呼、延攬新對象時，市務人員必定要做足功課，準備周詳，不能掉以輕心，否則走寶之後，後患無窮。Nike本來希望騎士隊會與西岸雷霆爭冠軍嘅，因為兩隊都係N嘅贊助球會，兩隊決賽對N有大利。誰知道雷霆對勇士領先3比1之後，勇士竟可絕地反擊連贏三場，成為NBA歷史上第十支從1比3翻盤，反敗為勝嘅球隊。假如勇士繼續贏落去（現先領先二比零），連續兩年掃走King James，N牌就認真冇癮，UA就成為大贏家。當今體育球賽與贊助不可分，樣樣講贊助商、贊助費，與商業掛鈎。奧運會本是業餘人士不在乎勝利嘅比賽場合，𠵱家仲有邊個信呀，羽毛球王林丹點肯打波冇報酬吖！