廖碧兒、王宗堯同趙學而喺ViuTV劇集《瑪嘉烈與大衛系列綠豆》上演愛情三角錯，噚日佢哋喺銅鑼灣拍攝冤家路窄場面，已婚嘅學而話如果現實中發生，真係幾難搞：「好彩我老公生生性性，唔使我愁呢啲，但見到朋友為呢啲情況頭痕，我只能盡力開解。」
提到因撐佔中而得罪強國市場嘅何韻詩，被國際護膚品牌Lancôme割席，宗堯覺得最難係令自己人支持本土，提到王菀之刪走力撐阿詩嘅微博，唔知係咪被河蟹？宗堯話：「我相信應該係有大量攻擊。」問到宗堯工作有冇受阻滯？佢話：「係搵少好多，但良心嘢係要撐。」
碧兒被爆好多盤
問到宗堯有冇試過三角戀﹖佢直認：「試過，喺冇交代清楚嘅時候，唔小心介入咗人哋嘅關係裏面，或者拍緊拖出現新嘅人。但我本身未結婚，好似劇情咁嘅情況未試過喺我身上發生，我未需要揀老婆定情婦，𠵱家連揀女朋友都有問題。」
學而轉問碧兒幾時搵番個筍盤？碧兒話：「𠵱家暫時湊狗仔，總之我未結婚又未生仔。」學而聽見後即刻爆料：「佢好多盤揀㗎！」碧兒尷尬地笑住話：「朋友啫，食吓飯。」
撰文：馮仁昭