近年特別留意新樓盤嘅名字，事關地產商好畀心機，搵埋晒啲罕見嘅古字、異體字，又周遊列國搵啲小國或地區嘅英文名，真正令大家增廣見聞呀。新鴻基地產（016）噚日又推新盤，呢個位於屯門良德街8號項目命名為珀御，英文為「Eight Regency」。
呢個單幢樓盤提供321伙，樓盤名表面睇冇乜特別，查實內裏充滿「發」字乾坤，由於個盤位於良德街8號，於是英文名有8字，logo包含8字，預計落成日期係2018年8月，又有兩個8字；而樓盤面積最大嘅三房單位就係大約870方呎。數埋夠晒發又八（卦）。
新地代理業務部總經理張卓秀敏指，正待批預售樓花同意書，最快月內推售。唔知會唔會等到8月先賣得呢？