半夜回家，有個蓄二撇雞的肥佬靠門而立，他左手拿着罐啤酒，右手在刷手機，滿臉通紅，顯然醉了。他一見我，就用半鹹淡廣東話說：「馮生，禾係關羽，你跟孔明叫禾『鬍鬚』得嘞。」
我一聽即大詫：「關生你喺度做咩？你應該去『爛禽』幫手至係。仲有，羅貫中明明話你『髯長二尺』，點解剃成二撇雞？」
關羽蠶眉一蹙，鳳眼圓睜，先不忘把手機放入褲袋，再從身後抽出把尺許長西瓜刀，指着我說：「咪提羅貫中，禾喺上面啱啱斬開佢十九碌。」
我忍不住說：「關生，唔係，鬍鬚，羅生假假哋係你最強公關，唔係《三國演義》，阿水識你？原諒我比較直，你係小國武將，仲要打輸，又有啲中二病，可以同孔子齊名，全靠羅生公關做得好，乜咁冇義氣㗎你？」
關羽即連珠炮發：「禾死後千年不知幾安樂，六朝人興拜項羽，又何嘗唔係敗軍之將？啲人一向都拜Loser㗎啦。唐朝狄仁傑拆晒啲邪神祠廟，剩低夏禹、泰伯、季札、伍子胥，禾依然樂得清靜。但宋徽宗唔知發咩癲，先封禾做忠惠公，又封義勇武安王，到羅貫中寫埋小說，禾就開始紅過自己塊面，明朝做埋關聖帝。清世祖入關前征服蒙古，又拎本《三國演義》嚟抽我水，話滿人係劉備，蒙古係關羽，之後為咗討好蒙古，就瘋狂幫禾升級，搞到個銜頭水蛇春咁長，咩『忠義神武靈佑仁勇威顯護國保民精誠綏靖翊贊宣德關聖大帝』，點可能唔面紅先？儒教叫禾做忠義代言人，道教要禾驅魔，黑白兩道搵禾睇場，唞吓都唔得，真係死不如生！𠵱家你哋班香港人，又忽然當我公關，日夜召喚，禾把幾火，終於忍唔住一刀劈死禾個公關羅貫中，唔係佢，禾𠵱家仲得閒過吳克儉呀！」
關公最後叫我代發聲明，澄清他沒有轉行做公關，若有人再召喚他，莫怪刀下無情。