特首梁振英出訪法國，加上政務司司長林鄭月娥去咗訪美，所以噚日就由財政司司長曾俊華出任署理特首。唔知係咪知道選特首要靠工聯會，曾俊華噚日開行會前接信時，特別重視工聯會成員，唔只逐一同佢哋握手，仲影埋合照先離開。
曾俊華接完信，就主動接受記者訪問，被問到今次係咪為未來出任特首累積經驗時，鬍鬚曾笑指︰「我都唔係第一次署理㗎嘞！」問佢會否參選下屆特首，鬍鬚曾只淡淡然話︰「都係一個會嚟嘅箒。」咁以後逢星期二，想唔想喺出席行會前都答記者問題？鬍鬚曾就一邊耍手，一邊行開話︰「應該唔會啦。」
至於另一個盛傳係下屆特首黑馬嘅林鄭，噚日就喺華盛頓同美國高層官員、國會成員同智庫高層會面，宣傳香港係兼具全球同中國優勢嘅城市，發言時又大讚香港一國兩制運作良好，個人基本權利同自由均受《基本法》保障，特區政府致力維護法治，唔知林鄭咁唱好香港，北京又會唔會加佢分？