歐國盃決賽周香港時間周六凌晨喺法國揭幕，同以往唔同，香港播映權今年由nowTV同樂視共同擁有。作為球迷，究竟點join plan最抵？我求大俠一於幫你計吓。
近年大型足球賽事向來由單一電視台獨家播，今屆歐國盃破天荒有兩個收費台直播，球迷想睇波當然要畀錢；不過，最低限度價錢都有唔同，A餐定B餐悉隨尊便。環顧坊間推出嘅歐國盃收費plan，now推出700蚊睇晒美洲盃同歐國盃83場波嘅通行證，但大前提要係舊客兼本身有解碼器先得。不過，2016年約滿嘅舊客，只要續約就可以免費獲贈通行證；2016年未完約嘅，就要因應續約條款以優惠價購買通行證，一般可以用半價350蚊買到。
至於樂視就以平搶客，現有客戶（即已有盒子）只要畀多249蚊就有51場歐國盃睇，未有盒子嘅就599蚊包埋，仲要唔使簽約，聽落好似好吸引；不過，佢哋早前播英足盃嗰陣，《蘋果》搵專家測試直播能力同畫質，結果出現一分鐘嘅延誤，畫質亦同平時睇高清嘅有啲距離，觀眾點揀就自己衡量吓啦。
牛丸遊日叉電晒三點式
兩個台播同一場波，製作都要拗吓手瓜。now TV搵到小休復出嘅著名評述員馬啟仁（Keyman）做主力，樂視除咗向對家挖走蔡育瑜等一班講波佬，仲搵埋人氣教練「牛丸」陳婉婷同陳偉豪去法國直擊，認真大手筆。牛丸為咗準備呢次歐遊，最近就去日本沖繩旅遊叉叉電，仲以三點式示人㖭。
