上水鄉委會主席侯志強（侯強）有份牽頭組嘅「新進步聯盟」，原本組黨劍指9月立法會選舉，但成立典禮臨門脫腳，至今仍然只聞樓梯響。不過，八方發現侯強呢排頻頻落區（圖），日前就見佢去到沙田派福袋，有街坊話留低地址就可以拎一袋，內有米、牛奶、兩隻糭等。八方問過侯強，佢話自己一向有落區，唔係近排先做，派福袋係趁過節問候吓街坊，明言唔主張問人拎地址，不過街坊如果想留個聯絡，佢都歡迎。
其實佢嚟緊仲會搞「西貢一天遊 鯉魚門海鮮宴」，118元大小同價，包食、車、保險、景點門票等，每位團友可獲贈小禮物一份。出手咁重，係咪準備好參選？佢話積極考慮中，出唔出戰要睇吓新進步聯盟公司註冊及社團註冊幾時批，最後都可能與志同道合嘅人合作喎。