英格蘭（圖）歐國盃決賽周23人大軍名單一出，手機中本來水靜鵝飛的波友群組，突然活躍過港交所。睇淡友阿強：「黐線！唔選真禾特，呢條中場線肯定分組賽出局！」專家Simon：「真禾特麻麻地箒，離開李斯特城未必有用。」死忠小黃：「唔係呀，中場線幾好喎，防中有艾歷迪亞，起碼夠硬淨。」阿強：「硬淨咪等攞紅牌囉！中場係需要一個識交最後一腳靚波的助攻手。」
小黃：「咁有迪利阿里呀！今屆喺熱刺勁多助攻！而且有占美華迪、哈利卡尼，前鋒幾強！」阿強：「但朗尼又嘥咗個位呢？唔知選佢做乜？」Simon：「話晒係英軍史上入球最多前鋒，大賽係要有個大佬壓場！」阿強：「英軍每屆問題就係太多大佬！泰利、林伯、謝四……個個當自己球星，唔夠謙卑，死硬！」小黃：「唔係喎，今屆無乜人扮大佬喎！大部份後生仔，我覺得真係有機！」Simon：「我就擔心後防無個大佬壓場喇…」阿強：「都話太多大佬係長年死穴咯！」小黃：「都話今屆已經無人扮大佬咯……」
經過數百個訊息激辯，最終當然係無結論；皆因英軍始終最惹港人關注。其實矛盾唔怕有，能百花齊放先至夠過癮。否則像Simon突然轉話題：「亞洲區世盃外，大家認為中國有無機會出線？」阿強：「無。」小黃：「同意。」完。這樣「和諧」的討論，有何樂趣？
文：方柏翹