今年維園六四27周年燭光集會，民主黨創黨主席李柱銘同立法會議員單仲偕因為去咗比利時布魯塞爾開會，趕唔切返港，改為去當地中國駐歐盟使館外點蠟燭哀悼。單仲偕同八方講，其實當晚有啲驚險，幾乎畀使館入面班疑似保安捉到！
話說佢同馬丁凌晨三、四點去使館悼念，最初怕俾使館人員發現，所以先坐的士喺後門落車，試點蠟燭哀悼，發現冇保安出嚟阻止，就梗係嗱嗱聲走去使館正門搞悼念，搞完一輪，上的士準備走人之際，使館入面先有幾個着晒制服嘅中國人出嚟，似乎想阻止佢哋，不過就來遲咗一步！單仲偕估計因為佢哋咁夜搞悼念，就算使館門口有CCTV影到，入面班保安怕且都換唔切衫出嚟捉佢哋！