一年到尾𥄫實法國八卦新聞的盧先生果然心水清，一眼睇穿爛琴關公災難應該不會得到巴黎總公司搭理，他們的大老闆碧潭菇女士近年醜聞不絕，牽涉範圍既有政治獻金也有母女情仇，如果拿來改編電視劇閒閒哋可以拍足一百二十集，遠東小歌女淪為畏懼霸權犧牲品的個案簡直雞毛蒜皮，自顧不暇的她肯抽出寶貴時間還人家一個公道才怪。我從來不是何韻詩小姐粉絲，對其出櫃、大愛及撐雨傘等等義勇行為，都保持冷靜作壁上觀，這回也實在沉不住氣，百分百舉手支持「一間公司商業上畏縮而過份自我審查的決定，牽動了一整個社群的恐懼，助長了另一個極權的橫蠻」的控訴。事件最令人迷惑的，不是該機構判斷能力的低鄙和處理問題的愚拙，而是那種拿屎上身的勇氣：香港藝人多的是，既然冇膽識冇腰骨抗拒內地紅衛兵式打壓，當初為什麼聘請何小姐？俗語話齋，冇咁大個頭學乜人戴咁大頂帽，狼狽的雙輸局面，其實完全可以避免，話晒都係堂堂國際名牌，自掘墳墓搞出一灘屎，不是令人遺憾而是令人齒冷。
大陸網民熱血沸騰喊打喊殺，早已司空見慣，淡定的商家睬你都傻，杯葛就算不是發發牙痕過日辰，真的對業務產生影響，最多不外如發哥所講「咪搵少啲囉」，美容護膚品食水幾深眾所周知，唔賺野蠻大媽大姐的一筆難道會死？發財而不立品已經罪無可赦，一見勢色不對忙不迭扮演縮頭烏龜，先澄清嘉賓並非代言人繼而乾脆取消演出，慷慨向全世界示範何謂「因財失義」，更是肉酸到無以復加，聲譽以這樣的方式一鋪清袋，so sad so sad so sad。