今季完成意甲五連霸嘅祖雲達斯，繼2008年後再度來港同南華友賽。主辦賽事嘅推廣公司噚日公佈，兩隊下月30日喺大球場交鋒；呢場係今夏唯一喺香港舉行嘅外隊賽，票價300至680蚊唔算貴，但祖記多位國腳要踢美洲盃同歐國盃，有乜球星來港真係好難估。
戴巴拿、靴蘭尼斯勢有份
歐洲各大球會近年為爭取亞洲市場，不時趁暑假東來踢表演賽兼備戰新球季，但適逢今年有美洲盃同歐國盃，一班國腳出征完先放假，所以大多數會延遲歸隊。祖記貴為意甲班霸，國腳如雲，如果保方、基亞連尼、古達度同文迪蘇傑等都來港，到時大球場坐兩萬觀眾應該冇問題，但最後有幾齊腳就好難估，暫時淨係知保羅戴巴拿、靴蘭尼斯同阿歷士辛度應該會到。
推廣公司首席執行官鳥羽秀貴噚日話，祖記今次亞太之旅先去澳洲鬥熱刺同墨爾本勝利，之後來港友賽南華，賽後即刻飛返歐洲備戰新球季；斑馬兵團嘅初步名單要下月初先知，但原則上係最強陣容喎。佢仲話祖記係今夏唯一訪港嘅外隊，球迷應該識貨，300至680蚊嘅門票屬合理水平，如果今次有好反應，將來會帶多啲世界級勁旅來港。球迷咪以為佢講吓就算，呢間叫Catalyst嘅推廣公司，其實係籌辦國際冠軍盃嗰間Relevent Sports LLC嘅姊妹公司；後者呢個暑假安排咗曼城同曼聯喺北京鳥巢比賽，又同皇馬、巴塞、拜仁、車路士等全部有合作，所以今次反應理想的話，下年真係可能有其他勁旅襲港㗎。
南華收六位數字戲金
南華今次唔係主辦身份，踢表演賽仲有六位數字戲金，足主張廣勇話對入座率有信心，兩萬球迷唔係問題，仲準備兩千張飛作慈善用途。下月開操嘅南華暫時續由列卡度領軍，新成員要遲啲先公佈，但我求大俠收到風，飛馬年輕中堅梁諾恆好大機會「上山」喎。
