大台一直喺10點半時段主攻旅遊節目，星期一終於轉口味，播出薛家燕、岑麗香及張致恆(Steven)嘅生活資訊節目《乜都攪掂晒》，仲搵咗曾志偉做第一集嘉賓。
本來呢啲生活小知識都有幾啱師奶fans嘅口味，喺節目教人食wasabi唔攻鼻嘅秘方，同埋飲管循環再用，第一集嘅平均收視有16點(約104萬人次收看)。
但係有唔少網民睇完之後，覺得同當年鮑起靜喺亞視嘅《開心大發現》，由佈景、內容甚至節目形式，相似程度極高，仲發現呢兩個節目原來都係張洪翅監製。
查實當日喺記者會，家燕姐已經俾人問過呢件事，佢尷尬話冇睇亞視。而有份主持嘅Steven昨日接受傳媒訪問，佢話：「我知道有《開心大發現》呢個節目，亦都知道監製同好多班底都係喺《開心》過嚟，但係從來都冇睇過。」講到網民喪鬧，Steven話：「我又唔覺得呢啲係點樣抄嘅嘢。同大家分享呢啲知識係好需要，有啲人知道嘅嘢，唔代表全部人都知，所以我哋想將呢啲資訊介紹俾大家，主要係希望可以環保啲同慳錢啲。」Steven仲話：「如果下下都係咁講，嗰啲重拍金庸嘅電視劇，咪冇新意囉？咁乜嘢都唔使做喇！」