近排股市最hit話題，非「殼股」莫屬。曾經係新股「超購王」嘅米蘭站（1150），月前突然停牌，正當大家憧憬賣盤成功之際，大股東兼主席姚君達宣佈，向18位承配人配售近2.87億股，公司再無控股股東，好地地一隻殼就咁被批散出街。
小股東等唔到賣盤消息，可能會有啲失望，事隔一個月，噚日米蘭站喺股東會後宣佈，搵咗位新執董胡博，仲有獨立非執董周承嶫。
39歲嘅胡博，據稱2002年喺東北財經大學畢業，對銷售及市場推廣擁有豐富經驗，將會喺公司主責探索新業務，董事薪酬30萬元。周承嶫就38歲，現職證券公司顧問，之前曾經喺華懋同瑞銀工作，佢亦係另類投資分析師，董事袍金為20萬元。
市場口痕主觀意願咁認為，米蘭站其實係做緊分段賣盤操作，最關鍵當然係嗰18位承配人係乜水、背後有冇人負責喇，不過可以預期嘅係，新董事陸續有來，新人事新作風吖嘛。