無論那些際遇，回憶都會太倦！現年68歲的「詞壇聖手」盧國沾筆下的《小李飛刀》、《找不着藉口》、《前程錦繡》越嗒越有味！41歲壯年的沾Sir在家中昏迷，蘇醒後左手殘廢了，出院後上街再被推跌，曾中風13次的老婆做了他的枴杖，兩人互相扶持，今生無悔！
撰文：余燕儀
縱橫70、80年代的盧國沾筆下金曲無數，當年是電視餸飯的年代，他為劇集寫的歌曲唱到街知巷聞，下月沾Sir假紅館舉行作品展，日前他在家中接受本報專訪，自從行動不便後，結婚30多年的盧太不離不棄照顧，相濡以沫。
寫詩追求太太
13歲已投稿的沾Sir才情橫溢，盧太更是資優生，15歲考入中文大學，沾Sir寫詩追求：「我係新聞系大阿哥，太太係小師妹，我教佢選科。當時我住堅道，佢住灣仔，佢坐電車，我送佢一段路。」盧太是否他的第一個女友？沾Sir笑笑說：「係呀，都唔敢話唔係。」
當年沾Sir昏迷的畫面，盧太仍歷歷在目：「嗰次佢外國返嚟話好攰沖涼先，點解咁耐唔出嚟？我開門見佢撼喺沖涼缸同洗手盆角落，暈咗成地血。醫生話20分鐘再唔醒，就宣佈死亡！我成個癲婆咁又冇着鞋，我同天講：『佢一句說話都冇講，就咁走咗我點算，個女又細！』之後佢有番郁動，嗰時有隻歌《今生無悔》，護士話：『盧生，好醒啦，聽吓你隻歌！』昏迷4日佢突然醒：『乜你哋班女人咁嘈㗎！』」
「呢生好好運氣」
沾Sir回想蘇醒後的情形：「我點解唔見咗左手？冇晒感覺！醫生話我撞爆左邊眉骨，大量失血，左手殘廢咗。」沾Sir出院後搬去跑馬地，當時用枴杖行路，有日獨自落街被小朋友撞跌，盧太說：「我好徬徨，啱啱附近有養和醫院救番佢，嗰次之後，我同佢講，以後冇跟得夫人一齊，唔准自己落街，我係好殘忍，但我冇辦法，嗰次跌一跌真係好傷！」
左手殘廢了，行動又不便，但沾Sir豁達說：「坐輪椅人哋睇唔起，我都幾十歲，冇乜自卑感，佛教嘅放下，高𥧌時我都冇乜特殊表現，只係比較忙，從來唔覺自己成功。今生無悔！我瞓喺醫院都有唔開心，今日係咪最後一日？自己嘅歌嚟同自己告別。我呢生都好好運氣，冇放棄我做作家嘅夢。」
