成立於1986年嘅民協噚日發表30周年宣言，主席莫嘉嫻喺記者會上讀出宣言，話港人自主並非尋求港獨，而係透過港人內部自決，決定特首人選、立法會點樣普選、決定香港經濟發展、規劃、教育，單程證審批權等：「要阻止香港本地事務繼續受到中港一體化入侵，損害自治。」
至於同阿爺嘅關係，宣言話，不抗拒與中央政府進行有意義嘅商議，不排斥對香港社會、經濟有利嘅合作。但莫嘉嫻表明，只要梁振英一日在任，民協都唔會主動同中央溝通。民協立法會議員馮檢基就話，如果梁振英連任，對香港一定係災難，以及反映中央已決定不再理會香港人意願。