英超下周四先正式公佈下季賽程，不過英國《鏡報》噚日就有疑似曼聯下季賽程流出，8月13日揭幕戰對升班馬般尼，12月要連鬥利物浦、阿仙奴及曼城，不過有傳係惡搞，真定假要15號先知。曼聯主場奧脫福周日就搞咗場英格蘭對世界球星嘅慈善賽，英軍就由迪科爾梅開二度，以3:2勝出，原本英軍搵摩連奴帶隊，但佢就讓位俾艾拿迪斯教，摩佬期間更同「烏鴉口」比利握手，唔知佢頂唔頂得住球王祝福。不過摩連奴被車仔前女軍醫伊娃控告歧視案已經有排煩，伊娃拒絕120萬鎊賠償（約1,343萬港元），決定告到底。