出身自書香世代的盧國沾，爺爺是清朝大官康有為的弟子，他卻謙說：「我阿爺係狀元，自己中文唔叻，填詞係撞彩㗎，我夠膽做任何事，年輕時好有自信。」沾Sir覺得現今歌詞，跟以前最大不同：「我哋嗰代係一生一世，𠵱家唔啱就分手。」
沾Sir最快20分鐘寫完一首歌詞，最耐要兩日，從沒被要求改詞：「未試過咁恐怖嘅事，因為每首歌我都唱過，我唱到，你係歌星一定唱到，你比我仲叻。」譚詠麟《傲骨》是沾Sir收工之作，問到會否再開工？他說：「冇乜開工需要，𠵱家個個唔鍾意畀錢，因為我收得貴，七十至八十年代係香港富裕年代，我嘅年代搵到食，𠵱家唔知，所以多數唔會再填，寫過嘅題材唔想再寫。」