雖然話近年做投資銀行賓架冇以往咁好搵，難再獲分巨額bonus，但光環仍在，係好多後生仔嘅dream job。據《金融時報》報道，今年大行高盛收到超過25萬份職位申請，比2012年多40%。
投行一向被指要求高與壓力大，除咗金錢誘因，仲有乜原因令咁多人想投身高盛？《金融時報》解釋，自從金融海嘯，雷曼與貝爾斯登等投行執咗，投行數目越來越少，顯得高盛好馨香。第二個原因係投行近年努力改善「做死人」形象，齊齊仿效Google模式，標榜生活與工作並重。
今年申請加入高盛嘅，包括22.38萬名大學生，主要申請做暑期實習生與分析員職位。另一間大行摩根大通亦冇跑輸大市，收到嘅大學畢業生求職申請比2014年多四成。
不過，殘酷嘅事實係，投行職位其實唔多，高盛舊年只係請咗9,700人，而摩根大通嘅大學生錄取率只有約2%，的確係爭崩頭。So sad！