睇網上留言，好多讀者成日都叫嚷「先達快啲執」，現在機會嚟喇！因為記者終於見證先達的轉變。
今個星期，有一間非常另類的商店入主先達一樓。問附近相熟Sales，這個行業自先達有歷史以來，從未出現過，它就是「飛髮舖」！仲要係現時最當紅，只有剪髮、冇沖水，兼以廉價取勝的「齋剪店」，其新鮮情度，係問裏面店員都話：「我哋未諗到店名！」
$50飛個髮、長者/學生$45！剪完髮仲要有水壺、腰包等開業小禮物贈送，在先達這個以往出名貴舖租的黃金地段，應如何生存？
聽手機舖Sales講：「我們呢類『舊約』店舖，其實都已經減咗舖租，不過仍然是以萬元價位作計算，但新入來的店舖，減租優惠要豪得多了。」記者最近聞說，有不少旺角地舖商戶，正打算在先達租舖做貨倉；價錢有多平？據知暫時以二樓舖租最平，如果是一些較偏遠、舖位細，兼有輕微漏水的舖位，月租最低價可達$3,800！正常一點百餘呎單位，都只是月租$5,500-$6,500；至於人流較多的一樓舖，現時大概都是$8,000-$10,000之間，至於地下舖則仍然是主戰場，舖租減幅相對有限！
未來的先達會如何？會否更加「百花齊放」？變成旺角最大型的「雜架攤」？
原本這裏是手執中港兩地手機牛耳的商場，這裏的「控價」！曾經令大陸手機的隨着我們的愛惡而升跌！現在大陸手機舖已開始聯手「翻控」香港價格，香港可能真的再容不下一個先達了。
記者、攝影：朱崇德
