要講創意，最好係搵近期憑演唱會「坎坷過後有艇搭」、變身「明福俠」，再靠白咖啡重新上位嘅「金句王」黎明。噚日朝早佢喺「文化產業高峰論壇2016」成為壓軸嘉賓演講。大家都知佢「朝早唔會空肚食早餐」，但佢當然做好準備，精神上台繼續大爆新金句。
想搞基金吸納地區歌王
提到創意，黎明就話，「其實創意……有啲創意，好多創意，自己創意咗出嚟之後，做完自己開心。」佢認為，如果只諗賺錢，壓力會大得多。佢話創意又不能天馬行空，「覺得自己有機會做Spiderman（蜘蛛俠），綁住條繩喺中環IFC飛過去中銀，練10次都唔會成功㗎喇」。
之後講到點樣促進本地文化產業時，佢就好玄咁話：「如果我可以做到嘅話，就諗啲我可以做到嘅嘢去做喇。」目前佢希望搞一個「小社區基金」，舉辦新媒體活動，吸納地區歌王，唔簽約唱歌，旗下唱片公司都可以從中選拔新人。如果反應良好，從下載歌曲取得嘅收入，可以放入基金，繼續培養新人㖭。
正當大家以為佢有晒計劃，點知佢轉頭又話係一時興起，一輪嘴咁講：「我成日覺得，記者會裏面係講嘢唔做嘢，所以我想做嘢，喺做嘢裏面，就搵啲自己做到嘅嘢同大家做，咁呢個係我做到嘅嘢！」聽完呢番說話，大家有冇同八方一樣有些少見暈？
李八方
mailto:[email protected]