中銀香港（2388）之前收咗中國信達（1359）成680億元，賣甩南商銀行，賺唔少，適逢噚日舉行股東會，各位小股東除咗關心股東會上派嗰張餅卡，當然仲想知道銀行有冇得派特別股息，嗒番粒糖喇。
可惜中銀香港呢類中資大行，高級管理層全部來自祖國，操濃濃北京口音嘅普通話，就算話派糖都唔係個個聽得明。
有長情小股東余婆婆就投訴，由中銀香港股價19蚊開始持有，都唔記得揸咗幾多年，但係一直唔知班管理層喺股東會講乜，「又唔係講英文，講國語點聽得明！」
華華記得，舊年3月總裁岳毅新上任冇耐，提過自己廣東話係「識聽唔識講」，所以將來會多學廣東話。家陣過咗一年有多，應該有進步啩，既然有小股東投訴，下年開會就試吓講廣東話喇。