日本女星武田玲奈人氣急升，下個月佢就19歲生日，唔止係深受少男歡迎，佢做埋《non-no》模特兒可算吸納埋女性fans支持。武田玲奈今年推出處女寫真集《short》，而呢本喺佢出生地福島同埋遠赴新西蘭取景嘅新書，甫上架亦反應熱烈，出版商更加印1萬本，令首批出貨多達2萬5千本。連福山雅治主演嘅富士電視台新劇《Love Song》，早前都搵佢客串做俏護士，繼第4集之後，武田玲奈宣佈第9集會再有演出戲份。
武田玲奈始終都係次世代女神，唔少網民又覺得佢有齊新垣結衣嘅氣質，絕對有進一步走紅嘅條件，武田玲奈獲邀上噚日播出嘅節目，氹得班麻甩諧星不知幾高興。
越來越搶手嘅武田玲奈走健康形象，就算拍水着寫真都只係標榜青春，不過近期網上出現好多佢嘅裸照，原來係被人移花接木，搞到事務所非常頭痕，擔心會影響武田BB嘅健康形象咁話。