今屆美洲盃係為咗慶祝賽事成立100周年而搞，點知唔單止啲球隊hea踢，連大會亦求求其其，居然連國歌都可以撈亂，將智利國歌誤以為係烏拉圭國歌，難得嘅係烏拉圭隊長高甸明知播錯都照唱到尾，認真有大將風範。
墨西哥（上圖）周日喺C組大戰烏拉圭，賽前大會播完墨西哥國歌後就播烏拉圭國歌，播咗幾秒烏拉圭球員就發現錯咗，門將梅斯利拿仲提醒企喺佢右邊嘅隊長高甸，但高甸冇理到照唱落去；而喺後備席嘅蘇亞雷斯（阿蘇）亦好愕然兼仲琜晒頭（下圖、中），完全唔理解點解會播錯國歌。大會事後向烏拉圭足總、國家隊同人民道歉，仲承認係人為錯誤，保證以後唔會再犯。
韋斯摩根玩到攰踢半場
講番場波，墨西哥藉對手艾華路佩雷拉擺烏龍而開波四分鐘就入波，加上馬基斯同埋赫達靴里拉各入一粒，最後輕取有阿蘇因傷缺陣嘅烏拉圭3:1，可以話係截至周日為止表現最似樣嘅一隊。同組牙買加同日0:1輸畀委內瑞拉，佢哋中堅韋斯摩根因幫李斯特城贏英超後，出席太多慶祝活動而搞到好攰，呢場只係喺臨完上半場由後備入替，踢咗半場多啲，咁都得？