雷神莫雷拉家陣每贏一場馬，就破一次由自己保持的全港紀錄。
這天跑到第三場四班草地1200米，又見到雷神呢位神級騎師殺入凱旋門，佢騎蔡廐生力軍上次初出跑第二的「嫡愛寶」，被捧成一面倒大熱。結果人馬合作無驚無險，前置守好位下大勝逾兩身位先過終點，成功開齋，單Win及組合獨贏A1，分別派18.5及12元。
三歲馬「嫡愛寶」馬主團體成員中，包括金牌馬販派斯(David Price)，佢嘅相馬能力果然眼光獨到，此駒兩戰火速取一冠一亞，冇入錯貨。
與「嫡愛寶」相同年紀的文廐三歲馬「心思熟慮」，閘前俾落飛黨賭到獨贏着綠燈15倍，本身沿途貼欄前領，拉士雖然腳仔有點軟，但都頂到個第二返嚟，取得服役生涯首次上名，鞍上人史卓豐繼第二場「大寶庫」後再做二奶。
今場三、四名由一對四歲馬瓜分，分別係容廐59倍大冷門「勝利公爵」及蘇廐「辣辣椒」，四重彩派二萬一千幾。其中「勝利公爵」馬主團體成員中，包括牙醫歌手許廷鏗的父親許義鏞，以及許廷鏗哥哥許永鏗。