基金經理黃國英（Alex）今個星期六再喺灣仔伊館舉行talk show，不過佢話就算早前喺報章雜誌落埋廣告都冇乜效果，全場大約2,000個位，𠵱家仲有百幾張山頂位飛未賣晒，估計連廣告費，呢場show要蝕幾萬甚至近十萬元。
Alex指，近排市況確實「衰得好交關」，呢個銷情已經預咗兼收貨，到時亦都會按計劃有現場抽獎，送機票、船飛。
Alex其實預咗大約700張飛，送畀旗下基金客戶，仲搵到贊助送出約600張飛，實際要公開發售嘅飛只有700張左右，單計預售已經賣出大半，真正「生客」只有大約一百個位，即係本來諗住吸納多啲新觀眾入場嘅計劃，唔太成功嘞。
臨近開show，Alex𠵱家日日都要綵排一次，只要市況變動唔大，講稿應該已大致係定案，只欠香港同外圍嘅推股名單未落實，要度到最後咁話。