周秀娜、鄭欣宜、蔡瀚億（BabyJohn）等，前晚喺銅鑼灣hmv出席電影《29+1》煞科宴，現場娜姐同欣宜仲切蛋糕補祝生日。上月22號31歲生日嘅娜姐，要紮住隻腳現身，原來佢拍電影《女士復仇》時拗柴，佢話：「嗰日着住對3、4吋高踭鞋跑，做end pose時趴晒地。醫生叫我唔好再着高踭鞋，等隻腳冇咁腫就會繼續拍動作戲。」
欣宜晒泳照
而上星期一29歲生日嘅欣宜就話生意拍檔以及公司同事分別為佢搞驚喜派對，又收到朋友送畀佢細個同媽咪合唱嘅黑膠碟：「呢份心意令我感動到當場喊咗出嚟。」佢之前去峇里島享受陽光與海灘，仲日日喺網上晒泳裝照，欣宜笑話：「唔係晒泳衣，係曬太陽。我好難搵到啱身泳衣而又着得好睇。」
至於BabyJohn戲中同欣宜係一對，仲有咀嘴戲，欣宜當住記者面前逼問BabyJohn佢好唔好咀，BabyJohn惟有話：「都好錫嘅！」多年前吳卓羲同欣宜世紀之吻引發好多網民意見，BabyJohn笑話：「咁咪好囉！佢係女神，咀佢係我嘅榮幸，未錫前我已向另一伴備案，而我另一伴又好支持，我又錫得舒服。」
撰文：馮仁昭