【男潮籽】潮人睇穿　假NMD六大破綻

【男潮籽：玩物達人】
一對adidas NMD惹來全球瘋炒，由原價千幾炒至逾六千，如此賺錢良機，試問生產強國怎會放過呢？記者近日找到一對「超A」NMD，仿真程度直迫天際，就連波鞋達人也要落足十二分眼力才能分辨真偽。以下將會臚列A貨的六大疑點，記得畀錢前先睇真，別被奸商宰割！

平民R1 Primeknit　多人買易中招

adidas NMD R1 Primeknit

【假】（左）人民幣999約港幣1,200

【真】港幣3,499

近半年，NMD可謂街頭曝光率最高的鞋款，坊間除了熱炒OG色，聯乘Nice Kicks推出的特別版亦炒至逾六千。不過這些天價款式都是睇多過買，而今次要分辨的黑色NMD R1 Primeknit則較為「平民」，炒價「只」約$3,499，因為較多人購買，相對亦較多人中招。至於為大家拆穿六大破綻的達人，就是波鞋網站KICKZ-LAB的管理員熊勵勤（熊兄）及許威廉（威廉），二人不約而同地說：「假鞋嘅細緻度再度提升，入手嗰陣真係要打醒十二分精神，廢事俾不法商人有機可乘。」

波鞋達人熊兄（左）及威廉均表示這對假NMD的仿真度極高，一般人難以分辨。

德國遊客Jannik仔細觀察真假NMD後，仍以為假鞋才是真貨，可見仿真度極高。

破綻1：亮身鞋盒

一般來說，假鞋盒的像真度往往較鞋本身低，以NMD為例，假的比較亮身，真的比較啞色。另外就是盒側標籤上的鞋相，假的解像度較低，真的則較清晰，「但要留意，標籤上嘅號碼樣式喺唔同國家都有不同，唔可以用嚟分真假。」威廉說。江湖又傳聞不少奸商會以一隻真鞋配一隻假鞋來賣，所以有機會掛羊頭賣狗肉，還是看清鞋身較妥當。