下季英超領隊大執位，哥迪奧拿入主曼城、宿敵摩連奴過擋曼聯，阿仙奴領隊雲格為求自保，真係唔使錢買人都唔得，除咗已經收購瑞士中場格列沙加外，據報已經啟動買斷條款，以二千萬鎊（約2.2億港元）收購李斯特城前鋒占美華迪，正備戰歐國盃嘅華迪，據報已申請暫時離隊到阿仙奴體測，有望周一成事，華迪更可獲10萬鎊（約１,128萬港元）周薪合約。華迪入廠，最大影響當然係同屬前鋒嘅基奧特（藍衫），基奧特上周六代表法國友賽蘇格蘭就個人梅開二度，協助法國大勝3:0。賽後記者問及華迪加盟睇法，基奧特就話自己都好欣賞華迪，有信心可以互補長短咁話喎。