近期最紅嘅政界中人，肯定係民建聯港島區立法會議員鍾樹根啦，因為佢被個黨蝦喎，而面對住一如譚耀宗粒瘜肉被割走嘅危機，佢冇吞聲忍氣啃咗佢，反而嚟個絕地大反撲，聲言會為咗參選而考慮退黨，而且個fb仲突然嚟料有正嘢睇，成功呃到唔少like。
噚日下午應邀去到柴灣海旁貨物起卸區，出席東區龍舟競渡大賽嘅律政司司長袁國強，唔知係咪都好驚訝，建制中人都有敢於反抗無理欺壓嘅時刻，所以同主禮嘉賓Tree根同場之際，一度向對方豎起手指公，唔通大讚對方係真的漢子？
不過Tree根就手指指好激動，唔會係向司長當面控訴民建聯點樣大石壓樹根啩？