這天泥地跑道兩場泥地賽，都由1檔馬勝出，分別為頭場「旅遊一哥」及第七場「機緣再現」，其中「機緣再現」幫落飛黨贏大錢。
第七場三班泥地1200米，隸屬李易達馬房的「機緣再現」夥拍梁家俊，藉1檔之利輕取對手一馬位，騎練及馬匹連捷於同程，上仗贏黃頌顯盃，今仗則奪捧走香港大學校友會盃。「機緣再現」今仗乃升上三班上陣，原本係逾10倍冷門，不過閘前倒水咁倒，畀落飛黨賭到得番5.5倍開跑，好似冇錢冇命咁款，結果落飛黨扣本後獲利約1,000萬；而組合獨贏A3派27.5元。
「機緣再現」今場恃住磅輕，貼欄稍留住跑，直路移出越衝越勁，就此趕過沿途放頭的半冷門「霸氣」，馬主李偉然又同靚靚千金一身白雪公主look的Gina一齊拉頭馬。
比較唔好彩是容天鵬馬房，第六場「鐵胆王」用潘頓出擊做二奶，今場「霸氣」刻意配黃皓楠減七磅靠放，可惜放唔到都係第二，而三、四名分別係大熱門「花月流星」及閘前雷神曾落馬被獸醫檢視過的「勁開心」，四重彩派一萬三千幾。