有「長洲覆核王」之稱嘅郭卓堅（圖），前日獲友人邀請去澳門睇水舞間，但前日下午3點幾搭船抵達澳門外港碼頭邊境站時，卻被當局以「內部保安的穩定構成威脅」為理由，拒絕入境澳門。
「真係好小器！」郭卓堅話佔中時疑被澳門列入「黑名單」不獲入境，但後來幾次去澳門都畀入，估計因為前日適逢六四27周年「敏感時期」先被拒：「我小人物一個，一向都好低調，同埋都成80歲啦，點會有乜威脅到佢？」仲揚言以後都唔去澳門。
郭卓堅仲話，喺澳門邊境站被扣留足足3粒鐘先至獲離境搭船返港，其間亦見兩名20幾歲女子被遣返，「我唔識佢哋，又唔見係乜嘢大人物，唔知點解都唔畀入境」。